ಜೊತೆಗಿರದ ಜೀವ ಎಂದಿಗೂ ಜೀವಂತ !

   ನಮ್ಮ ಪ್ರೀತಿಯ ಪುನೀತ್ ರಾಜಕುಮಾರ್ ನಮ್ಮನ್ನ ಅಗಲಿದ್ದಾರೆ.ತುಂಬಾ ದಿನಗಳಿಂದ ಅವರ ಬಗ್ಗೆ ಬರೆಯಬೇಕು ಅಂತ ಅನ್ನಿಸ್ತಿತ್ತು. ಅಷ್ಟೊಂದು ವಿಸ್ತಾರವಾಗಿ ಅಲ್ಲದಿದ್ದರೂ ಗೊತ್ತಿರುವ ವಿಷಯವನ್ನೂ ನಿಮ್ಮ ಮುಂದೆ ಇಡುವ  ಪುಟ್ಟ ಪ್ರಯತ್ನ.

ಪುನೀತ ರಾಜ್ ಕುಮಾರ್ ೧೯೭೫ ಮಾರ್ಚ ೧೭ ರಂದು
ನಟ ಸಾರ್ವಭೌಮ,ಕರ್ನಾಟಕ ರತ್ನ ಡಾ.ರಾಜ್ ಕುಮಾರ್ ಹಾಗೂ ವಜ್ರೇಶ್ವರಿ ಕಂಬೈನ್ಸ್ ನ ನಿರ್ಮಾತೃ ಪಾರ್ವತಮ್ಮ ರಾಜಕುಮಾರ್ ಅವರ ಸುಪುತ್ರನಾಗಿ ಜನಿಸಿದರು. ಇವರಿಗೆ ಇಬ್ಬರು ಸಹೋದರರು ಮತ್ತು  ಸಹೋದರಿಯರಿದ್ದಾರೆ.
ಅಶ್ವಿನಿ ಅವರನ್ನು ವರಿಸಿದ ಇವರಿಗೆ ಇಬ್ಬರು ಮುದ್ದಾದ  ಹೆಣ್ಣುಮಕ್ಕಳಿದ್ದಾರೆ.

 ಇವರ ನಟನೆಯ ವಿಷಯಕ್ಕೆ ಬಂದರೆ ಇವರ ನಟನೆ, ನೃತ್ಯ ವೈಖರಿಗೆ ಎಲ್ಲರೂ ಮನಸೋತಿದ್ದಾರೆ. ಚಿಕ್ಕ ವಯಸ್ಸಿನಲ್ಲೇ ನಟನೆ ಶುರು ಮಾಡಿದ ಇವರು ಹತ್ತು ಹಲವು ಸಿನಿಮಾಗಳಲ್ಲಿ ನಟಿಸಿ ತಮ್ಮ ಕಲೆಯ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾರೆ.

ಪ್ರೀತಿಯ ಅಪ್ಪು ನಟನಾಗಿ ಅಲ್ಲದೇ ಹಾಡುಗಾರನಾಗಿ, ನಿರ್ಮಾಪಕನಾಗಿ ತಮ್ಮದೇ ಸ್ವಂತ PRK ಪ್ರೊಡಕ್ಷನ್ ಹೌಸ್ ಮೂಲಕ ಚಿತ್ರ ನಿರ್ಮಾಣ ಕೂಡ ಮಾಡುತ್ತಿದ್ದರಲ್ಲದೆ PRK ಆಡಿಯೋ ಕಂಪನಿ ಕೂಡ ಶುರುಮಾಡಿದ್ದರು.

ಮೊನ್ನೆ ಹೃದಯಾಘಾತದಿಂದ ಪುನೀತ್ ರಾಜಕುಮಾರ್ ಮೃತಪಟ್ಟ ವಿಷಯ ಎಲ್ಲರಿಗೂ ಗೊತ್ತಿರುವಂತದ್ದೇ.ಕರುನಾಡಿನ ಜನರು ಅವರ ಅಗಲಿಕೆಯಿಂದ ಕಂಗಾಲಾಗಿದ್ದರು. ಎಲ್ಲರಲ್ಲೂ ದುಃಖದ ಮನೆ ಮಾಡಿತ್ತು. ಏಷ್ಟೋ ದೂರದಿಂದ ಅಭಿಮಾನಿಗಳು ಅವರ ಅಂತ್ಯ ಸಂಸ್ಕಾರಕ್ಕೆ ಆಗಮಿಸಿದ್ದರು.ಅವರ ಅಂತಿಮ ಸಂಸ್ಕಾರಕ್ಕೆ 20 ಲಕ್ಷಕ್ಕೂ ಅಧಿಕ ಮಂದಿ ಬಂದಿದ್ದರು ಎಂದು ಅಂದಾಜಿಸಲಾಗಿದೆ. ಅಲ್ಲಿ ನೆರೆದ ಜನರ ಸಂಖ್ಯೆ ಮಹಾತ್ಮ ಗಾಂಧೀಜಿ ಅವರ ಅಂತಿಮ ಸಂಸ್ಕಾರ ಬಿಟ್ಟರೆ ಇಡೀ ದೇಶದಲ್ಲಿ ಇವರ ಅಂತಿಮ ಸಂಸ್ಕಾರಕ್ಕೆ ಅಷ್ಟು ಜನ ಸೇರಿದ್ದರು ಎಂಬುದು ಗಮನಾರ್ಹ ಸಂಗತಿ.

ಕರ್ನಾಟಕ ಸರ್ಕಾರ ಅಚ್ಚುಕಟ್ಟಾಗಿ ಅವರ ಅಂತಿಮ ಸಂಸ್ಕಾರ ನಡೆಸಿ ಕೊಟ್ಟಿದೆ.ಸಹಕರಿಸಿದ ಎಲ್ಲ ಇಲಾಖೆ ಅವರಿಗೂ ಕೃತಜ್ಞತೆಗಳು ಸಲ್ಲುತ್ತವೆ.

ರಾಜ್ಯ ಸರ್ಕಾರ ಹನ್ನೆರಡು ವರ್ಷಗಳ ನಂತರ ಪ್ರಥಮ ಬಾರಿಗೆ  ಮರಣೋತ್ತರವಾಗಿ ಪುನೀತ್ ರಾಜಕುಮಾರ್ ಅವರಿಗೆ "ಕರ್ನಾಟಕ ರತ್ನ"  ಪ್ರಶಸ್ತಿಯನ್ನು ಕೊಡಲು ನಿರ್ಧರಿಸಿದೆ. "ಪದ್ಮಶ್ರೀ" ಪ್ರಶಸ್ತಿ ಕೊಡಬೇಕೆಂದು ಕೇಂದ್ರ ಸರ್ಕಾರಕ್ಕೆ ಶಿಫಾರಸು ಕೂಡ ಮಾಡಿದೆ. ಇವೆಲ್ಲ ಅವರ ಕಾರ್ಯಕ್ಕೆ ಸಂದ ಗೌರವ ಎಂದರೆ ತಪ್ಪಾಗಲಾರದು.

ಇನ್ನು ಅವರ ಸಾಮಾಜಿಕ, ಶೈಕ್ಷಣಿಕ ಕಾರ್ಯಗಳು ಎಲ್ಲರಿಗೂ ಮಾದರಿಯಾಗಿವೆ. ಅವರು ನಡೆಸುವ ಶಕ್ತಿಧಾಮ ಆಶ್ರಮದಲ್ಲಿ ೧೮೦೦ ವಿದ್ಯಾರ್ಥಿಗಳು ಶಿಕ್ಷಣ ಪಡೆಯುತ್ತಿದ್ದಾರೆ.೧೯ ಗೋ ಶಾಲೆ, ಅನಾಥಾಶ್ರಮ ಅಲ್ಲದೇ ಸರ್ಕಾರಿ ಶಾಲೆಗಳನ್ನು ದತ್ತು ಪಡೆದು ಅದರ ಸರ್ವತೋಮುಖ ಅಭಿವೃದ್ಧಿಗೆ ಒತ್ತು ನೀಡಿದ್ದಾರೆ.
ಈಗ ಇವುಗಳನ್ನು ಅವರ ಸಹೋದರ ಶಿವರಾಜ್ ಕುಮಾರ್ ನೋಡಿಕೊಳ್ಳುತ್ತಿದ್ದಾರೆ.ಅವರಿಗೆ ಶಕ್ತಿ ತುಂಬುವ ಕೆಲಸ ಅವರ ಇಡೀ ಕುಟುಂಬ ಮಾಡುತ್ತಿದೆ.

ಅವರ ಸಾವು ಕರ್ನಾಟಕದ ಜನರಿಗೆ ನೋವುಂಟು ಮಾಡಿರುವುದು ಅಷ್ಟೇ ಸತ್ಯ. ಈಗಲೂ ಕೂಡ ಅವರ ಸಮಾಧಿಗೆ ಜನರು ಸಾಲು ಗಟ್ಟಿ ನಿಂತು ಅವರ ದರ್ಶನ ಪಡೆಯುತ್ತಿದ್ದಾರೆ. ಯಾವುದೇ ಊರಿಗೆ ಹೋದರೂ ಅವರ ಭಾವಚಿತ್ರಗಳು ಕಾಣಸಿಗುತ್ತವೆ.ಫೋಟೋ ಸ್ಟುಡಿಯೋ, ಕಾರ್,ಬೈಕ್ ಹಾಗೂ ಮನೆಗಳಲ್ಲಿ ಅವರ ಭಾವ ಚಿತ್ರವನ್ನಿಟ್ಟುಕೊಂಡು ಅವರ ಮೇಲಿನ ಪ್ರೀತಿಯನ್ನು ತಮ್ಮದೇ ಆದ ರೀತಿಯಲ್ಲಿ ವ್ಯಕ್ತಪಡಿಸಿದ್ದಾರೆ.ಏಷ್ಟೋ ಜನ ಬೈಕ್, ಸೈಕಲ್ ಮೂಲಕ ಅವರ ಮನೆಗೆ ಬಂದು ತಮ್ಮ ನೋವನ್ನು ಅವರ ಮೇಲಿದ್ದ ಪ್ರೀತಿಯನ್ನು ವ್ಯಕ್ತಪಡಿಸಿದ್ದಾರೆ.

ಈಗಿನ ಪ್ರಚಾರ ಪ್ರಿಯ ಪ್ರಪಂಚದಲ್ಲಿ ಮಾಡಿದ ಸಣ್ಣಪುಟ್ಟ ಕೆಲಸಕ್ಕೂ ಮನ್ನಣೆ ಸಿಗಬೇಕೆಂದು ಆಸೆ ಪಡುವವರ ಮಧ್ಯೆ ಅವರು ಜೀವಂತವಿದ್ದಾಗ ಯಾರಿಗೂ ಗೊತ್ತಿರದ ರೀತಿಯಲ್ಲಿ ಅವರು ಮಾಡಿದ ಸಾಮಾಜಿಕ ಕಾರ್ಯಗಳು ನಮ್ಮೆಲ್ಲರಿಗೂ  ಸ್ಪೂರ್ತಿದಾಯಕವಾಗಿವೆ.ನಾವು ಕೂಡ ಇದನ್ನು ಅವರಿಂದ ಕಲಿಯಬೇಕಾಗಿದೆ.

ಅಪ್ಪು ಏಷ್ಟೋ ಸಲ ನಾನು ನಿಮ್ಮ ಕೆಲವು ವೀಡಿಯೋಗಳನ್ನು ನೋಡಿದಾಗಲೆಲ್ಲ ಕಣ್ಣಂಚಲ್ಲಿ ನೀರು ತುಂಬಿ ಬರುತ್ತದೆ.ಭಗವಂತ ನಿಮ್ಮನ್ನು ಇಷ್ಟು ಬೇಗ ಕರೆದುಕೊಂಡು ಬಿಟ್ಟ ಆ ನೋವು ಇನ್ನೂ ನಮ್ಮನ್ನ ಕಾಡುತ್ತಿದೆ.ನೀವು ಜೀವಂತವಿದ್ದಾಗ ನಿಮ್ಮ ಅಭಿಮಾನಿಗಳ ಸಂಖ್ಯೆ ಏಷ್ಟಿತ್ತೋ ಗೊತ್ತಿಲ್ಲ ಆದರೆ ನಿಮ್ಮ ಅಗಲಿಕೆಯ ನಂತರ ಕೋಟ್ಯಂತರ ಅಭಿಮಾನಿಗಳನ್ನ ನೀವು ಸಂಪಾದಿಸಿದ್ದಿರಿ ಅದರಲ್ಲಿ ನಾನು ಕೂಡಾ ಒಬ್ಬ.
ಇರಲಿ ಅಪ್ಪು ಹೋಗಿ ಬನ್ನಿ. ನಿಮ್ಮ ಆತ್ಮಕ್ಕೆ ಶಾಂತಿ ಸಿಗಲಿ.ನೀವು,ನಿಮ್ಮ ನಗು ನಮ್ಮ ಮನದಲ್ಲಿ ಸದಾ ಜೀವಂತವಾಗಿ ನೆಲೆಸಿರುತ್ತದೆ.

- ಅಭಿಷೇಕ. ಜೆ. ಎಂ

"ನನ್ನ ಪ್ರೀತಿಯ ಪದ್ಮಪ್ಪಜ್ಜನಿಗೊಂದು ಅಂತಿಮ ವಿದಾಯ ಪತ್ರ..."

ನಮ್ಮಜ್ಜ ನಮ್ಮನ್ನೆಲ್ಲ ಬಿಟ್ಟು ಅಗಲಿದ್ದಾರೆ.ವಿಧಿ ವಿಧಾನಗಳ ಪ್ರಕಾರ ಎಲ್ಲ ಕಾರ್ಯಗಳು ಸುಸೂತ್ರವಾಗಿ ನೆರೆವೇರಿದವು.  ಬೆಳಿಗ್ಗೆ ಎದ್ದಾಕ್ಷಣ ಮನಸ್ಸು  ಯಾಕೋ ಭಾರ ಅನ್ಸ್ತು.ಅಜ್ಜನ ಬಗ್ಗೆ ಬರೀಬೇಕು ಅನ್ನಿಸ್ತು.

ನಂಗೆ ಅನ್ಸಿದ್ದನ್ನ ಈ ಬರಹದ ಮೂಲಕ ಅಜ್ಜನಿಗೆ ತಲುಪುತ್ತೆ ಎಂಬ ಕಿರುದಾಸೆಯೊಂದಿಗೆ ಕಣ್ಣಂಚಲ್ಲಿ ನೀರು ತುಂಬಿಕೊಂಡು ಇದನ್ನು ಬರೆಯುತ್ತಿದ್ದೇನೆ.

ಶ್ರೀಯುತ ಭರಮಪ್ಪ-ತಿಪ್ಪಮ್ಮನವರ  ಪುತ್ರರಾಗಿ ಧರೆಗೆ ಬಂದ ನೀವು, ಸುಶೀಲಮ್ಮರವರನ್ನು ವರಸಿ,ಒಂಬತ್ತು ಜನ ಮಕ್ಕಳನ್ನು ಹೊತ್ತು ,ಇಪ್ಪತ್ತೊಂದು ಮೊಮ್ಮಕ್ಕಳನ್ನು ಸಾಕಿ ಸಲುಹಿ,ಹದಿನೇಳು ಮರಿಮೊಮ್ಮಕ್ಕಳನ್ನು ಕಂಡ ಅಪರೂಪದ ಜೀವ ನಿಮ್ದು.

ಹಲವು ವರ್ಷಗಳ ಕಾಲ ನಮ್ಮೂರಿನ ಬಸದಿಯಲ್ಲಿರುವ ಶ್ರೀ ಚಂದ್ರನಾಥ ತೀರ್ಥಂಕರರ ಸೇವೆ ಸಲ್ಲಿಸಿದ್ದು,

ಸ್ವಾತಂತ್ರ ಹೋರಾಟದ ಸಂದರ್ಭದಲ್ಲಿ ಗಾಂಧೀಜಿ ಅವರು ಹರಪನಹಳ್ಳಿಗೆ ಬಂದಾಗ ನೀವು ನಡೆದುಕೊಂಡೇ ಅಲ್ಲಿಗೆ ಹೋಗಿ ಅವರಿಗೆ ಬೆಂಬಲ ಸೂಚಿಸಿದ್ದು , ಎಂ ಪಿ ಪ್ರಕಾಶ, ಖ್ಯಾತ ರಂಗಭೂಮಿ ಕಲಾವಿದೆ ಸುಭದ್ರಮ್ಮ ಅವರೊಡನೆ ನಾಟಕವಾಡಿದ್ದು ಇಲ್ಲಿ ಸ್ಮರಿಸಬಹುದಾದ ಸಂಗತಿ. 

ಮಾಗಳದಲ್ಲಿ ಪಂಚಾಯ್ತಿ ಮಾಡಿ,ಎಲ್ಲ ಜನರ ಕಷ್ಟ-ಸುಖದಲ್ಲಿ ಭಾಗಿಯಾಗಿ,

ಎಲ್ಲರಿಗೂ ಒಳ್ಳೆಯದನ್ನೇ ಬಯಸೋ,  ಸದಾ ಕಷ್ಟಕ್ಕೆ ಮಿಡಿಯೋ ಹೃದಯ ನಿಮ್ದು.

ನಾವು ಚಿಕ್ಕವರಿದ್ದಾಗ ನಿಮ್ಮ ಹತ್ರ ಣಮೋಕಾರ ಮಂತ್ರ ಪಠಣೆ ಮಾಡೋದು,ಮಗ್ಗಿ ಹೇಳಿಸಿ ಕೊಂಡಿರೋದು  ಮರೆಯಲಾಗದ ಅನುಭವ.ನೀವು ಹಾಕಿಕೊಟ್ಟ ದಾರಿಯಲ್ಲಿ ನಡೆಯುತ್ತಾ,ನಿಮ್ಮಲಿರುವ ಧಾರ್ಮಿಕ ಸಂಸ್ಕಾರವನ್ನು ರೂಢಿಸಿಕೊಂಡು ಮುನ್ನಡೆಯುತ್ತೇವೆಂಬ ಭರವಸೆಯನ್ನು ನಿಮಗೆ ನೀಡುತ್ತೇವೆ.

ಯಾವಾಗ್ಲೂ ಅಷ್ಟೆ ನಿಮ್ಮೊಂದಿಗೆ ಎಲ್ಲರೂ ಕುಳಿತಾಗ ಏನಾದ್ರೂ ಹಳೆಯ ಘಟನೆಗಳನ್ನು ನೆನಪು ಮಾಡಿಕೊಂಡು ಅದನ್ನು ನಮ್ಮೊಡನೆ ಹಂಚಿಕೊಳ್ಳುತ್ತಿದ್ರಿ,ಅದನ್ನ ನಾವೆಲ್ಲ ಇನ್ಮೇಲೆ ತುಂಬಾ ಮಿಸ್ ಮಾಡ್ಕೋತಿವಿ ಅಜ್ಜ.

ಇತ್ತೀಚಿಗೆ ಎಲ್ಲ ಮೊಮ್ಮಕ್ಕಳು ನಿಮ್ಮೊಂದಿಗೆ ಮಾತಾಡ್ತಾ ಕೂತಾಗ ನಾನು ನಿಮ್ಗೆ ಅಜ್ಜಿ ಹೆಂಗ್ ಅಜ್ಜ ಅಂತ ಕೇಳ್ದೆ ನೀವು ಅಜ್ಜಿನ "ರಾಜಮಾತೆ" ಅಂತ ಒಂದೇ ಪದದಲ್ಲಿ ವರ್ಣಿಸಿ ಬಿಟ್ರಿ .ಅದನ್ನ ಕೇಳಿ ನಾವೆಲ್ಲ ಮಂತ್ರ ಮುಗ್ಧರಾಗ್ಬಿಟ್ವಿ. ಅಂದಹಾಗೆ ನಮ್ ಅಜ್ಜಿ ನಿಜವಾಗ್ಲೂ "ರಾಜಮಾತೆಯೆ" ಬಿಡಿ..!

ಕೆಲ  ದಿನಗಳಿಂದ ನಿಮ್ಮ ಆರೋಗ್ಯದಲ್ಲಿ ಏರುಪೇರಾದಾಗ ನಿಮ್ಮ ಸೇವೆ ಮಾಡಿದ ತೃಪ್ತಿ ನಮಗಿದೆ. ಆದರೆ ನೀವು ಬೇಗ ಗುಣಮುಖರಾಗಿ ಬರುತ್ತಿರಿ ಎಂಬ  ವಿಶ್ವಾಸ ನಮ್ಮಲ್ಲಿತ್ತು ನೀವು ಆ ವಿಶ್ವಾಸವನ್ನು ನಮ್ಮಲ್ಲಿ ತುಂಬಿದ್ರಿ ,ಆದ್ರೆ ನೀವು ಅದನ್ನು ಸುಳ್ಳಾಗಿಸಿದಿರಿ ಅಜ್ಜ.ಆ ನೋವು ನಮ್ಮಲ್ಲಿ ಇನ್ನೂ ಕಾಡ್ತಿದೆ.

ನಿಮ್ಮ ತೊಂಬೋತ್ತೆಳು ವರ್ಷಗಳ ಸುಖಿ ಜೀವನ ಸದಾ ನಮ್ಮ ನೆನಪಿನಲ್ಲಿರುತ್ತದೆ.ನೀವು ಹಾಕಿಕೊಟ್ಟ ದಾರಿಯಲ್ಲಿ ಸದಾ ಮುನ್ನಡೆಯುತ್ತೇವೆ ಎಂಬ ವಾಗ್ಧಾನವನ್ನು ನಿಮಗೆ ಈ ಮೂಲಕ ತಿಳಿಸುತ್ತಾ ,ನಿಮ್ಮ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಆ ಭಗವಂತನಲ್ಲಿ ಪ್ರಾರ್ಥಿಸುತ್ತೇನೆ..

ಅಂದಹಾಗೆ ಕೊನೆಕೊನೆಗೆ ನಿಮ್ಮ ಆರೋಗ್ಯ ತುಂಬಾ ಹದಗೆಡುತ್ತಿದ್ದಾಗ ಮದ್ಯಾಹ್ನದ ಸಮಯದಲ್ಲಿ ನೀವು ಮಲಗುವಾಗ ಸ್ವಲ್ಪ ಕಷ್ಟ ಪಟ್ರಿ ಆಗ ನಾನು ಜೈ ಜಿನೇಂದ್ರ  ಅಂದು ಮಲ್ಕೊ ಅಜ್ಜ ಅಂದೆ  ನೀವು ಜೈ ಜಿನೇಂದ್ರ ಅಂದು ನಿದ್ರೆಗೆ ಜಾರಿದ್ರಿ.ಆದರೆ ಕೊನೆಗೆ ಜೈ ಜಿನೇಂದ್ರ ಅಂತ ನಾನು ಅಂದೇ,ಆದ್ರೆ ನೀವು ಅನ್ಲೆ ಇಲ್ಲ ಅಜ್ಜ ,ಆಗ ದುಃಖ ಉಮ್ಮಳಿಸಿ ಬಂತು..

ಇರಲಿ ಅಜ್ಜ  ಹೋಗಿ ಬನ್ನಿ..

 ನಿಮ್ಮ ತೊಂಬತ್ತೇಳು ವರ್ಷಗಳ ಸುಧೀರ್ಘ ಪಯಣದಲ್ಲಿ ಕೆಲವು ವರ್ಷ ನಾವು ಕೂಡ ನಿಮ್ಮೊಂದಿಗೆ ಭಾಗಿಯಾಗಿದ್ದೇವು ಎಂಬುದೇ ನಮಗೊಂದು ಹೆಮ್ಮೆಯ ಸಂಗತಿ ಮತ್ತು ಅದು ನಮ್ಮ ಪುಣ್ಯ ಕೂಡ..

ನೆಮ್ಮದಿಯ ಜೀವನ ನಡೆಸಿದ ಮೆಣಸಿನಕಾಯಿ ಕುಟುಂಬದ "ಮಹಾಜ್ಞಾನಿ" ಗೆ ನಮ್ಮದೊಂದು 

ಅಂತಿಮ ನಮನ...

ಇಂತಿ ನಿಮ್ಮ ಪ್ರೀತಿಯ ಮೊಮ್ಮಗ

ಅಭಿಷೇಕ.ಜೆ.ಎಂ

"ನೇತಾಜಿ ಸುಭಾಷ್ ಚಂದ್ರಬೋಸ್"

 "ನೀವು ನನಗೆ ರಕ್ತ ಕೊಡಿ, ನಾನು ನಿಮಗೆ ಸ್ವಾತಂತ್ರ್ಯ ಕೊಡುತ್ತೇನೆ.ಸ್ವಾತಂತ್ರ್ಯವೆಂಬುದು ಯಾರೂ ಕೊಡುವಂಥ ಸರಕಲ್ಲ ಅದು ನಾವು ಪಡೆದುಕೊಳ್ಳಬೇಕಾದದ್ದು"ಎಂಬ ಹೇಳಿಕೆಯ ಮೂಲಕ ದೇಶಪ್ರೇಮದ ಕಿಚ್ಚನ್ನು ಜಾಗೃತಿ ಮೂಡಿಸಿದ ಕ್ರಾಂತಿಕಾರಿ ಸ್ವಾತಂತ್ರ ಹೋರಾಟಗಾರ ನೇತಾಜಿ ಸುಭಾಷ್ ಚಂದ್ರಬೋಸ್.

ಬಾಲ್ಯ- ವಿದ್ಯಾರ್ಥಿ ಜೀವನ


   ಬೋಸರು 1897 ಜನವರಿ 23 ರಂದು ಒಡಿಶಾದ ಕಟಕ್ ನಲ್ಲಿ ಜನಿಸಿದರು.ತಂದೆ ಜಾನಕಿನಾಥ್ ಬೋಸ್ ಮತ್ತು ತಾಯಿ ಪ್ರಭಾವತಿ.
ತಮ್ಮ ಪ್ರಾಥಮಿಕ ಶಿಕ್ಷಣವನ್ನು ಕಟಕ್ ನ ರಯವೆನಶಾ ಕೊಲಿಜಿಯೇಟ್ ಶಾಲೆಯಲ್ಲಿ ಪೂರೈಸಿದರು.ನಂತರ ಪದವಿ ಶಿಕ್ಷಣವನ್ನು ಮುಗಿಸಿ ತಂದೆ-ತಾಯಿಯ ಆಶಯದಂತೆ 1919ರಲ್ಲಿ ಐಸಿಎಸ್ (ಇಂಡಿಯನ್ ಸಿವಿಲ್ ಸರ್ವಿಸಸ್) ಪರೀಕ್ಷೆಯ ತರಬೇತಿಗಾಗಿ ಇಂಗ್ಲೆಂಡಿನ ಕೇಂಬ್ರಿಡ್ಜ್ ವಿಶ್ವವಿದ್ಯಾಲಯಕ್ಕೆ ತೆರಳಿದರು. ಪರೀಕ್ಷೆಯಲ್ಲಿ 4 ನೇ ಸ್ಥಾನಗಳಿಸಿ ತೇರ್ಗಡೆ ಹೊಂದಿ ಕೆಲಸಗಿಟ್ಟಿಸಿಕೊಂಡರು.ನಂತರ ವಿದೇಶಿ ನೌಕರಿ ಬೇಡವೆಂದು ಅದನ್ನು ತ್ಯಜಿಸಿದರು.

ರಾಜಕೀಯ


   ರಾಷ್ಟ್ರ ನಿರ್ಮಾಣದ ಜವಾಬ್ದಾರಿ ಹೊತ್ತು ತಾವು ನಂಬಿದ್ದ ನಿಲುವಿಗೆ ಬದ್ಧರಾಗಿ ರಾಷ್ಟ್ರ ಕಟ್ಟುವ ಕೆಲಸಕ್ಕೆ ಧುಮುಕಿದರು. ಬೋಸರ ಚಿಂತನೆಗಳೇ ಅತ್ಯಂತ ಶ್ಲಾಘನೀಯವಾವದ್ದು.ಇಂಗ್ಲೆಡ್, ಜರ್ಮನಿ, ಆಸ್ಟ್ರಿಯಾ ಹೀಗೆ ಹತ್ತು ಹಲವು ದೇಶಗಳಲ್ಲಿ ಮಿಂಚಿನ ಓಡಾಟ ನಡೆಸಿ ಸ್ವಾತಂತ್ರ ಹೋರಾಟದ ಅರಿವು ಮೂಡಿಸಿ,ಹೋರಾಟಕ್ಕೆ ತೀವ್ರತೆ ತಂದು ಕೊಟ್ಟರು.ಬೋಸರು ಶೀಘ್ರ ಸ್ವಾತಂತ್ರ ಪ್ರಾಪ್ತಿಗಾಗಿ ಪಡುತ್ತಿದ್ದ ಶ್ರಮ,ಅವರು ಮಂಡಿಸುತ್ತಿದ್ದ ವಾದಗಳು ಕಾಂಗ್ರೆಸ್ ನ ಕೆಲವು ಗುಂಪುಗಳ ಕೆಂಗಣ್ಣಿಗೆ ಗುರಿ ಮಾಡಿತು. ಅದರಿಂದ ಬೇಸತ್ತು ಬೋಸರು ಕಾಂಗ್ರೆಸ್ ತ್ಯಜಿಸಿದರು.
 ನಂತರ ಚಿತ್ತರಂಜನ್ ದಾಸ್ ರ ಸ್ವರಾಜ್ ಪಕ್ಷಕ್ಕೆ ಸೇರಿ 1923 ರಲ್ಲೀ ದಾಸ್ ಸ್ಥಾಪಿಸಿದ್ದ ಫಾರ್ವರ್ಡ್ ದಿನಪತ್ರಿಕೆಯ ಸಂಪಾದಕರಾಗಿ ಕಾರ್ಯ ನಿರ್ವಹಿಸಿದರು.ಕಾಲಕ್ರಮೇಣ 1927 ರ ನವೆಂಬರ್ ನಲ್ಲಿ ಬಂಗಾಳ ಪ್ರದೇಶ ಕಾಂಗ್ರೆಸ್ ನ ಅಧ್ಯಕ್ಷರಾಗಿ ಆಯ್ಕೆಯಾದರು.

ಹಾಗೆಯೇ 1933 ರಲ್ಲಿ ಅಖಿಲ ಭಾರತ ಟ್ರೇಡ್ ಯೂನಿಯನ್ ಕಾಂಗ್ರೆಸ್ ನ ಅಧ್ಯಕ್ಷರಾದರು.ಹಲವು ರಾಷ್ಟ್ರಗಳಿಗೆ ಭೇಟಿ ನೀಡಿ ಭಾರತದ ಪರ ಪ್ರಚಾರ ಮಾಡಿದರು,1937 ರಂದು ಭಾರತಕ್ಕೆ ಮರಳಿದರು.
 1938 ಫೆಬ್ರವರಿಯಲ್ಲಿ ಗುಜರಾತ್ ನ ಹರಿಪುರದಲ್ಲಿ ನಡೆದ ಅಖಿಲ ಭಾರತ ಕಾಂಗ್ರೆಸ್ ಅಧಿವೇಶನದ ಅಧ್ಯಕ್ಷರಾಗಿ ತಮ್ಮ ರಾಜಕೀಯ ಅನುಭವ ಹಂಚಿಕೊಂಡರು,ಬ್ರಿಟಿಷರ ಒಡೆದು ಆಳುವ ನೀತಿ ಎಲ್ಲವನ್ನೂ ಎಳೆ ಎಳೆಯಾಗಿ ಬಿಚ್ಚಿಟ್ಟರು.
ಕಾಂಗ್ರೆಸ್ ಅಧ್ಯಕ್ಷಗಿರಿಗಾಗಿ  ಪಟ್ಟಾಭಿ ಸೀತರಾಮಯ್ಯ ಅವರ ವಿರುದ್ಧ  215 ಮತಗಳ ಅಂತರದಿಂದ ಗೆದ್ದು ಕಾಂಗ್ರೆಸ್ ಅಧ್ಯಕ್ಷರಾದರು.ನಂತರ ಕಾಂಗ್ರೆಸ್ ನ ತಾರ್ಕಿಕ ನಡೆಗಳಿಂದ ಬೇಸತ್ತು ರಾಜೀನಾಮೆ ನೀಡಿ,ಆಲ್ ಇಂಡಿಯಾ ಫಾರ್ವರ್ಡ್ ಬ್ಲಾಕ್ ಎಂಬ ಸ್ವಂತ ಪಡೆಯನ್ನು ಸ್ಥಾಪಿಸಿದರು.

ನೇತಾಜಿ ಮತ್ತು ಗಾಂಧೀಜಿ
  

   ಬೋಸ್ ಮತ್ತು ಗಾಂಧೀಜಿಯ ನಡುವೆ ಮಹತ್ವವಾದ ಭಿನ್ನಾಭಿಪ್ರಾಯವಿತ್ತು ಎಂಬುದು ಎಲ್ಲರಿಗೂ ತಿಳಿದಿರುವ ವಿಷಯವೇ.ಆದರೆ ಬೋಸರು ಗಾಂಧೀಜಿಯನ್ನು ಭಾರತ ಸ್ವಾತಂತ್ರದ ಸರ್ವೋಚ್ಚ ನಾಯಕ ಎಂದೇ ಭಾವಿಸಿದ್ದರಲ್ಲದೇ ಅವರನ್ನು ಅಷ್ಟೇ ಗೌರವಿಸುತ್ತಿದ್ದರು.1939 ರಲ್ಲಿ ಬೋಸರು ಕಾಂಗ್ರೆಸ್ ಅಧ್ಯಕ್ಷರಾಗಿ ಮರು ಆಯ್ಕೆಯಾದಾಗ ಗಾಂಧೀಜಿ ಅದನ್ನು ವಿರೋಧಿಸಿದ್ದರಿಂದ ಅವರ ಮಧ್ಯೆ ಬಿರುಕು ಉಂಟಾಯಿತು.ಬೋಸರು ಪತ್ರದ ಮೂಲಕ ಗಾಂಧೀಜಿಗೆ 'ನಿಮ್ಮ ಬಗ್ಗೆ ನನಗಿರುವ ಗೌರವ ಯಾರಿಂದಲೂ ಕಡಿಮೆ ಮಾಡಲು ಸಾಧ್ಯವಿಲ್ಲ' ಎಂದು ಬರೆದರು.ಇದು ಅವರ ದೊಡ್ಡತನಕ್ಕೆ ಹಿಡಿದ ಕೈಗನ್ನಡಿ.
 ಇನ್ನು ಬೋಸರು ಮತ್ತು ಗಾಂಧೀಜಿಯವರು ಪಾಲಿಸುತ್ತಿದ್ದ ತತ್ವ ಸಿದ್ಧಾಂತಗಳು ತದ್ವಿರುದ್ದವಾಗಿದ್ದವು.
ಬೋಸರು 1944 ಜುಲೈ 6 ರಂದು ಸಿಂಗಾಪುರ ದ ಆಜಾದ್ ಹಿಂದ್ ರೇಡಿಯೋ ಭಾಷಣದಲ್ಲಿ ಗಾಂಧೀಜಿಯವರಿಗೆ 'ರಾಷ್ಟ್ರಪಿತ ' ಎಂದು ಸಂಬೋಧಿಸಿದ್ದು ಹಾಗೂ ತಮ್ಮ ಸೇನೆಯ ಸ್ವಾತಂತ್ರ ಸಮರಕ್ಕೆ ಆಶೀರ್ವಾದ ಬಯಸಿದ್ದು ವಿಶೇಷವಾಗಿತ್ತು.ಈ ಮೂಲಕ ಮಹಾತ್ಮಾ ಗಾಂಧೀಜಿಯವರಿಗೆ 'ರಾಷ್ಟ್ರಪಿತ '  ಪದವು ಮೊದಲು ಬಳಕೆಯಾಗಿದ್ದು ಬೋಸರಿಂದ ಎಂಬುದು ಗಮನಾರ್ಹ ಸಂಗತಿ.

ಇಂಡಿಯನ್ ನ್ಯಾಷನಲ್ ಆರ್ಮಿ [ I N A ]- ಆಜಾದ್ ಹಿಂದ್ ಫೌಜ್
  

   ಎರಡನೇ ಮಹಾಯುದ್ಧದ ಸಮಯದಲ್ಲಿ ಜಪಾನ್ ಸೇನೆಯು ಆಗ್ನೇಯ ಏಷ್ಯಾಕ್ಕೆ ನುಗ್ಗಿತು.ಆಗ ಬ್ರಿಟಿಷ್ ಸೇನೆಯಲ್ಲಿ 40000 ಕ್ಕೂ ಹೆಚ್ಚು ಭಾರತೀಯ ಯೋಧರನ್ನು ಸಮರ ಕೈದಿಗಳಾಗಿ ಬಂಧಿಸಲಾಗಿತ್ತು.ಇದನ್ನೇ ಬ್ರಿಟಿಷ್ ವಿರುದ್ಧ ಅಸ್ತ್ರವಾಗಿ ಬಳಸಿಕೊಂಡ ಜಪಾನ್ ಸೇನೆಯು ಐಎನ್ಎ ನಿರ್ಮಾಣ ಮಾಡಿದರು.
ಮೊದಲ ಐಎನ್ಎ ಮೋಹನ್ ಸಿಂಗ್ ನೇತತ್ವದಲ್ಲಿ ರಚನೆಯಾಯಿತು. ನಂತರ ಸೇನೆಯೊಂದಿಗಿನ ಭಿನ್ನಾಭಿಪ್ರಾಯದಿಂದ  ಛಿದ್ರಗೊಂಡಿತು.

  ನಂತರ ಸುಭಾಷರ ನೇತೃತ್ವದಲ್ಲಿ ಆಜಾದ್ ಹಿಂದ್ ಫೌಜ್ ಎಂದು ಮರುನಾಮಕರಣ ಮಾಡಲಾಯಿತು. ಇದನ್ನು  ಸಂಘಟಿಸುವುದರಲ್ಲಿ ರಾಸಬಿಹಾರಿ ಘೋಷರ ಶ್ರಮ ಅಪಾರವಾದುದು. ಕ್ಯಾಪ್ಟನ್ ಲಕ್ಷ್ಮಿ ಸೆಹಗಲ್ ಮಹಿಳಾ ಸೇನಾ ದಂಡ ನಾಯಕಿ ಆಗಿದ್ದರು.ಬೋಸರ ವಿವಾದಾತ್ಮಕ ವಿಮಾನ ದುರಂತದ ನಂತರ ಆಜಾದ್ ಹಿಂದ್ ಫೌಜ್ ಸಂಪೂರ್ಣ ವಾಗಿ ತನ್ನ ಕಾರ್ಯವನ್ನು ನಿಲ್ಲಿಸಿತು.

ಬೋಸರ ನಿಗೂಢ ಸಾವು


  ಬೋಸರ ಸಾವು ಅನೇಕರಲ್ಲಿ ಅನೇಕ ರೀತಿಯ ಸಂಶಯಗಳನ್ನು ಹುಟ್ಟು ಹಾಕಿದೆ. ಜಪಾನ್ ಸರ್ಕಾರ ಬಿಡುಗಡೆ ಮಾಡಿದ ವರದಿಯ ಪ್ರಕಾರ 1945 ಆಗಸ್ಟ್ 18 ರಂದು ಟೋಕಿಯಾಕ್ಕೆ ಹೊರಟಿದ್ದ ವಿಮಾನ ಅಪಘಾತದಲ್ಲಿ ನಿಧನರಾದರೆಂದು ಹೇಳಲಾಗುತ್ತಿದೆ.

  ಬೋಸರು ಪ್ರಯಾಣಿಸುತ್ತಿದ್ದ ವಿಮಾನ ಹಾರಾಟ ಆರಂಭಿಸಿದ ತಕ್ಷಣ ನೆಲಕ್ಕೆ ಅಪ್ಪಳಿಸಿದೆ.ಆಗ ಬೋಸರು ತೀವ್ರ ಗಾಯಗೊಂಡರು.ಮಧ್ಯಾಹ್ನ ತೆಪೈನ ಸೇನಾ ಆಸ್ಪತ್ರೆಗೆ ದಾಖಲಿಸಲಾಗಿತ್ತು,ಸಂಜೆ ಬೋಸರು ಮೃತಪಟ್ಟರು.ಆಗಸ್ಟ್ 22 ರಂದು ಬೋಸರ ಅಂತ್ಯ ಸಂಸ್ಕಾರ ನಡೆದಿದೆ ಎಂದು ವರದಿ ತಿಳಿಸಿದೆ. ಈ ರೀತಿ ಬೋಸರ ಸಾವಿನ ಬಗ್ಗೆ ಅನೇಕರಿಗೆ ಅನುಮಾನ ಮೂಡಿರುವುದು ಅಷ್ಟೆ ಸತ್ಯದ ಸಂಗತಿ.
ಇನ್ನು ಭಾರತ ಸರ್ಕಾರವು ನೇತಾಜಿಯ ನಿಗೂಢ ಸಾವಿನ  ತನಿಖೆಗೆ ಸಮಿತಿ ರಚಿಸಿ ವರದಿ ತಯಾರಿಸಿದೆ.

  

  ಭಾರತದ ಶಕ್ತಿ ಮತ್ತು ಸ್ಫೂರ್ತಿಯ ಸಹಕಾರ ಮೂರ್ತಿಯಾದ ನೇತಾಜಿಯವರ ನಿಸ್ವಾರ್ಥರಹಿತ ಸೇವೆ ಮತ್ತು ಅಪ್ರತಿಮ ಸ್ಪೂರ್ತಿಯನ್ನು ಗಮನಿಸಿದ ಕೇಂದ್ರ ಸರ್ಕಾರ 2021 ಜನವರಿ 23 ರಿಂದ ಪ್ರತಿ ವರ್ಷ ಜನವರಿ 23 ನ್ನು ಪರಾಕ್ರಮ ದಿವಸವನ್ನಾಗಿ ಆಚರಿಸಲು ನಿರ್ಧರಿಸಿದೆ. ಅದಲ್ಲದೇ ದೇಶದ ಅತ್ಯಂತ ಹಳೆಯ ರೈಲು ಕಾಲ್ಕಾಮೇಲ್ ಅನ್ನು ನೇತಾಜಿ ಎಕ್ಸ್ಪ್ರೆಸ್ ಎಂದು ಮರುನಾಮಕರಣ ಮಾಡಿದೆ.ಹೀಗೆ ಸರ್ಕಾರವು ಕೂಡ ತನ್ನದೇ ಆದ ರೀತಿಯಲ್ಲಿ ನೇತಾಜಿಯ ಉತ್ತಮ ಸೇವೆಯನ್ನು ಗುರುತಿಸಿ,ಗೌರವ ಸಲ್ಲಿಸುತ್ತಿದೆ.
ಹೀಗೆ ಬೋಸರು ತಮ್ಮ ಕ್ರಾಂತಿಕಾರೀ ತತ್ವವನ್ನು ಮೈಗೂಡಿಸಿಕೊಂಡು ಎಲ್ಲೂ ರಾಜೀ ಮಾಡಿಕೊಳ್ಳದೇ ಸ್ವಾತಂತ್ರ ತರುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದರು ಎಂಬುದು ಸ್ಮರಿಸುವ ಸಂಗತಿ.

ಜೈ ಹಿಂದ್ 🇮🇳

ಇಂತಿ ನಿಮ್ಮವ ✍️
🔹ಅಭಿಷೇಕ.ಜೆ.ಎಂ 🔹

Twitter :- @abhish_jm
Instagram :- @abhish_jm

"ನಳಂದ ವಿಶ್ವವಿದ್ಯಾಲಯ- Harvard of Ancient India"



ನಳಂದ ವಿಶ್ವವಿದ್ಯಾಲಯ - ಇದು ಪ್ರಪಂಚದ ಪ್ರಥಮ ಅಂತಾರಾಷ್ಟ್ರೀಯ ವಿಶ್ವವಿದ್ಯಾಲಯ. ಕ್ರಿಸ್ತ ಪೂರ್ವ 427 ರ ಗುಪ್ತರ ಆಳ್ವಿಕೆಯಲ್ಲಿ ರಾಜ ಕುಮಾರಗುಪ್ತ-೧ ಬಿಹಾರದ ರಾಜ್ಗಿರ್ ನಲ್ಲಿ ಇದನ್ನು ಸ್ಥಾಪಿಸಿದ. ಇದರ ಮೂಲ ಉದ್ದೇಶ ಸರ್ವರಿಗೂ ಶಿಕ್ಷಣ ಒದಗಿಸುವುದಾಗಿತ್ತು.

ಪ್ರಪಂದಾದ್ಯಂತ ಸುಮಾರು ಹತ್ತು ಸಾವಿರಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಇಲ್ಲಿ ವಿದ್ಯಾಭ್ಯಾಸವನ್ನು ಮಾಡುತ್ತಿದ್ದರು. ಇಲ್ಲಿನ ರಾಜವಂಶಸ್ಥರಿಗೆ ಜ್ಞಾನಾರ್ಜನೆ ಮಾಡುವುದೇ  ಮುಖ್ಯ ಉದ್ದೇಶ,ಆದ್ದರಿಂದ ರಾಜರುಗಳ ಇಚ್ಛೆಯಂತೆಯೇ ಯಾವ ವಿದ್ಯಾರ್ಥಿಗಳಿಗೂ ವಿಶ್ವವಿದ್ಯಾಲಯದಲ್ಲಿ ಶಿಕ್ಷಣ ಹಾಗೂ ವಸತಿಯ ಶುಲ್ಕ ಇರಲಿಲ್ಲ.

Harvard of Ancient India

ವಿದ್ಯಾರ್ಥಿಗಳಲ್ಲಿ ಧ್ಯಾನ ಹಾಗೂ ಜ್ಞಾನದ ವೃದ್ಧಿಗಾಗಿ ವಿಶ್ವವಿದ್ಯಾಲಯವು ಶ್ರಮಿಸುತ್ತಿತ್ತು.12 ನೇ ಶತಮಾನದವರೆಗೂ ವಿಶ್ವವಿದ್ಯಾಲಯವು ಅತ್ಯಂತ ಶ್ರದ್ಧೆಯಿಂದ ತನ್ನ ಕಾರ್ಯವನ್ನು ನಿರ್ವಹಿಸುತ್ತಿತ್ತು. 

ನಂತರದಲ್ಲಿ ಭಕ್ತಿಯಾರ್ ಖಿಲ್ಜಿಯ ಆಕ್ರಮಣಕ್ಕೊಳಗಾಗಿ ನಳಂದ ವಿಶ್ವವಿದ್ಯಾಲಯವು ನೆಲಸಮವಾಯಿತು.ಖಿಲ್ಜಿಯು ವಿಶ್ವವಿದ್ಯಾಲಯದಲ್ಲಿದ್ದ ಅನೇಕ  ಅಮಾಯಕ ಬೌದ್ಧ ಸನ್ಯಾಸಿಗಳನ್ನು ಜೀವಂತವಾಗಿ ಸುಟ್ಟ ಅಲ್ಲದೇ ಬೌದ್ಧರನ್ನು ಭಾರತದಿಂದ ಹೊರದೂಡುವ ಎಲ್ಲ ಪ್ರಯತ್ನಗಳನ್ನು ಮಾಡಿದ.ಈ ರೀತಿ ಖಿಲ್ಜಿಯು ಅಮಾನುಷವಾಗಿ ವರ್ತಿಸಿ ತನ್ನ ಪಾರುಪತ್ಯವನ್ನ ಮೆರೆದ.ಇದರಿಂದ ಬರಿ ಭಾರತಕ್ಕಲ್ಲ ಇಡಿಯ ಜಗತ್ತಿಗೆ ನಷ್ಟ ಉಂಟು ಮಾಡಿತು.

 ವಿದ್ಯಾರ್ಥಿಗಳ ನೆಚ್ಚಿನ ಗ್ರಂಥಾಲಯ-ಧರ್ಮಕುಂಜ

ಕುಂಜ ಅಂದರೆ ಜ್ಞಾನದ ಶಿಖರ. ನಳಂದ ವಿಶ್ವವಿದ್ಯಾಲಯವು ವಿದ್ಯಾರ್ಥಿಗಳಿಗೆ ಜ್ಞಾನ ಶಿಖರದ್ದಂತಿತ್ತು.ಅಲ್ಲಿನ ಧರ್ಮಕುಂಜ ಗ್ರಂಥಾಲಯವು ಲಕ್ಷಕ್ಕೂ ಅಧಿಕ ಪುಸ್ತಕಗಳನ್ನು ಹೊಂದಿತ್ತು.ಆಗಿನ ಕಾಲ ಘಟ್ಟದಲ್ಲಿ ಮುದ್ರಣಯಂತ್ರದ ವ್ಯವಸ್ಥೆ ಇರದ ಕಾರಣ ಎಲ್ಲವು ಕೈಯಿಂದ ಬರೆಯಲ್ಪಟ್ಟಿತ್ತು,ಹಾಗಾಗಿ ಪುಸ್ತಕವು ನಳಂದ ಬಿಟ್ಟರೆ ಜಗತ್ತಿನ ಬೇರೆಲ್ಲೂ ಲಭ್ಯವಿರುತ್ತಿರಲಿಲ್ಲ.

ಮೊಘಲರ ಕಾಲದಲ್ಲಿ ಪುಸ್ತಕಗಳನ್ನು ಬೆಂಕಿಗೆ ಆಹುತಿ ಮಾಡಿದಾಗ ಇಡೀ ಪುಸ್ತಕಗಳು ಸುಡಲು  ಕನಿಷ್ಠ 3 ತಿಂಗಳ ಸಮಯಬೇಕಾಯಿತು ಎಂದು ಇತಿಹಾಸ ಹೇಳುತ್ತದೆ.ಇದರಲ್ಲೇ ನಾವು ಊಹೆ ಮಾಡಿಕೊಳ್ಳಬಹುದು ಪುಸ್ತಕಗಳ ಸಂಗ್ರಹ ಎಷ್ಟಿತ್ತೆಂದು.ಹೀಗಾಗಿ ನಳಂದ ವಿಶ್ವವಿದ್ಯಾಲಯವು ಜ್ಞಾನ ಭಂಡಾರಕ್ಕೇ ಉದಾಹರಣೆಯಾಗಿ ನಿಲ್ಲುತ್ತದೆ. 

ಪುಸ್ತಕದ ಪುಟಗಳು  ಇಂಕ್ ನಿಂದ ಮುದ್ರಿತವಾಗಿರಬಹುದು.ಆದರೆ ಅವುಗಳು ಸಮಯ ಸಾಧಿಸುವ ಯಂತ್ರಗಳು. ಪುಸ್ತಕಗಳು ಹಿಂದೆ ನಡೆದದ್ದು ಹೇಳುತ್ತವೆ, ಭವಿಷ್ಯದ ಬಗ್ಗೆ ಎಚ್ಚರಿಸುತ್ತವೆ, ವರ್ತಮಾನದ ಬಗ್ಗೆ ಪರಿಚಯಿಸುತ್ತವೆ.


ನಳಂದ ವಿಶ್ವವಿದ್ಯಾಲಯವು ಕಾರ್ಯ ನಿರ್ವಹಿಸುತ್ತಿದ್ದ ಕಾಲದಲ್ಲಿ ಭಾರತದ ಜ್ಞಾನ ಭಂಡಾರವು ಪ್ರಪಂಚ ಎಲ್ಲಾ ದೇಶಗಳ ಜ್ಞಾನ ಭಂಡಾರಕಿಂತಲು ಮುಂದುವರೆದದ್ದಾಗಿತ್ತು,ಈಗಲೂ ಹಾಗೇ ಇದೆ.ನಳಂದ ವಿಶ್ವವಿದ್ಯಾಲಯವು ಭಾರತ ದೇಶದ ಇತಿಹಾಸ, ಸಂಸ್ಕೃತಿ, ವೈಭೋಗವನ್ನ ನಮ್ಮೆಲ್ಲರ ಕಣ್ಣೆದುರಿಗೆ ತೆರೆದಿಟ್ಟಿದೆ.

2010 ರಲ್ಲಿ ಭಾರತ ಸರ್ಕಾರವು ಹೊಸ ರೂಪವನ್ನು ನೀಡಿ ನವ ನಳಂದ ವಿಶ್ವವಿದ್ಯಾಲಯವನ್ನು ಸ್ಥಾಪಿಸಿದೆ. ಇದು "Institution of National Importance" ಮೇಲೆ ತನ್ನ ಕಾರ್ಯವನ್ನು ನಿರ್ವಹಿಸುತ್ತಿದೆ.

ಹೀಗೆಯೇ ನಳಂದ ವಿಶ್ವವಿದ್ಯಾಲಯವು ತನ್ನ ಕಾರ್ಯ ವೈಖರಿಯನ್ನು ಮುಂದುವರೆಸಿ ಪ್ರಪಂಚಕ್ಕೆ ಪ್ರಥಮ ಅಂತಾರಾಷ್ಟ್ರೀಯ ವಿಶ್ವವಿದ್ಯಾಲಯವಾಗಿ  ಹೊರಹೊಮ್ಮಿ ತನ್ನ  ಪಾರುಪತ್ಯವನ್ನ ಮೆರೆಯಲಿ ಎಂದು ಆಶಿಸುತ್ತೇನೆ...

ಜೈ ಹಿಂದ್ 🇮🇳

✍️ಇಂತಿ ನಿಮ್ಮವ ✍️

🔹ಅಭಿಷೇಕ.ಜೆ.ಎಂ🔹

Twitter :- @abhish_jm
Instagram :- @abhish_jm

"ಸ್ವಾತಂತ್ರವೀರ ಸಾವರ್ಕರ್"

ಸಾವರ್ಕರ್ ಎಂದರೆ ಕಿಚ್ಚು,

ಸಾವರ್ಕರ್ ಎಂದರೆ ಶಕ್ತಿ,

ಸಾವರ್ಕರ್ ಎಂದರೆ ಆತ್ಮಾಭಿಮಾನ,

ಸಾವರ್ಕರ್ ಎಂದರೆ ದೇಶಭಕ್ತಿ,

ಸಾವರ್ಕರ್ ಎಂದರೆ ಸಮರ್ಪಣೆ.

"ಸ್ವಾತಂತ್ರವೀರ ವಿನಾಯಕ ದಾಮೋದರ ಸಾವರ್ಕರ್".

ಆ ವೀರ ಕಲಿಯ ಹೆಸರು ಕೇಳಿದರೆ ಮೈ ರೋಮಾಂಚನಗೊಳ್ಳುತ್ತದೆ.1883 ಮೇ 28 ರಂದು ಮಹಾರಾಷ್ಟ್ರದ ನಾಸಿಕ್ ನ ಭಗೂರ್ ಗ್ರಾಮದ ದಾಮೋದರ ಸಾವರ್ಕರ್ ಮತ್ತು ಯಶೋದಾ ಸಾವರ್ಕರ್ ದಂಪತಿಗೆ ಜನಿಸಿದ ವಿನಾಯಕರು ಮುಂದೆ ವೀರ ಸಾವರ್ಕರ್ ಆಗಿ ಬೆಳೆದು ನಿಂತರು. ಚಾಪೇಕರ್ ಸಹೋದರರ ಸಾಹಸವೇ ಸಾವರ್ಕರ್ ರಿಗೆ ದಾರಿದೀಪ. ಭಾಷಣ, ಸಂಘಟನೆ, ಚಳುವಳಿ, ಬರವಣಿಗೆಯ ಮೂಲಕ ದೇಶಭಕ್ತರಿಗೆ ಅರಿವು ಮತ್ತು ಕ್ರಾಂತಿ ಮೂಡಿಸುತ್ತಿದ್ದರು.

ಸ್ನೇಹಿತರನ್ನು ಒಟ್ಟುಗೂಡಿಸಿ 'ಅಭಿನವ ಭಾರತ' ವನ್ನು ಸ್ಥಾಪಿಸಿ ದೇಶಸೇವೆ ಮಾಡುತ್ತಿದ್ದರು.ಬಾಲಗಂಗಾಧರ ತಿಲಕರ ಸಮ್ಮುಖದಲ್ಲಿ ವಿದೇಶಿ ಬಟ್ಟೆ ಮತ್ತು ವಿದೇಶಿ ನಿರ್ಮಿತ ವಸ್ತುಗಳನ್ನು ಕಲೆಹಾಕಿ ಅವುಗಳನ್ನೆಲ್ಲ ಸುಟ್ಟು ಭಸ್ಮಮಾಡಿ ದೇಶಪ್ರೇಮವನ್ನು ಮೆರೆದರು.ಅಭಿನವ ಭಾರತದ ಸ್ನೇಹಿತರು ತಮ್ಮ ದೇಶ ಸೇವೆ ಮುಂದುವರೆಸಿದ್ದರು. ಆದರೆ ಸಾವರ್ಕರ್

ತದನಂತರದಲ್ಲಿ ಸ್ಕಾಲರ್ ಶಿಪ್ ಪಡೆದು ತಿಲಕರ ನೆರವಿನೊಂದಿಗೆ ಉನ್ನತ ಶಿಕ್ಷಣಕ್ಕಾಗಿ ಲಂಡನ್ ನ ಗ್ರೇಸ್ ಇನ್ ಲಾ ಕಾಲೇಜು ಸೇರಿದರು.  ಶಾಮ್ ಜೀ ಕೃಷ್ಣ ಶರ್ಮಾ ಅವರು ನಡೆಸುತ್ತಿದ್ದ ಭಾರತ್ ಭವನ್ ನಲ್ಲಿ ಉಳಿದುಕೊಂಡಿದ್ದರು.

   

ಸಾವರ್ಕರ್ ಬಗ್ಗೆ ಕೇಳಿದಾಗಲೆಲ್ಲ  ಮದನ್ ಲಾಲ್ ದಿಂಗ್ರನ ಸಾಹಸಗಾದೆ ನೆನಪಾಗುತ್ತದೆ.

               

ಪಂಜಾಬ್ ಮೂಲದ ಶ್ರೀಮಂತ ಕುಟುಂಬದಿಂದ ಬಂದಿದ್ದ ಮದನ್ ಲಾಲ್ ದಿಂಗ್ರನ ಪರಿಚಯವಾಯಿತು. ಸಾವರ್ಕರ್ ರ ರಾಷ್ಟ್ರಪ್ರೇಮ,ನಾಯಕತ್ವ ಗುಣ,ಭಾಷಣ, ಬರವಣಿಗೆಯಿಂದ ಪ್ರೇರಣೆಗೊಂಡು ಸ್ವಾತಂತ್ಯ ಹೋರಾಟದಲ್ಲಿ ಭಾಗವಹಿಸಲು ನಿರ್ಧರಿಸಿದ.ಸಾವರ್ಕರ್ ರ ಒಂದೇ ಮಾತಿಗೆ  ದಿಂಗ್ರ ಬ್ರಿಟಿಷ್ ಅಧಿಕಾರಿ ಕರ್ಝನ್ ವೇಯ್ಲಿಯ ಎದೆಸೀಳಿ ,ತಾನು ವಿದೇಶದಲ್ಲಿ ಗಲ್ಲಿಗೇರಿದ ಮೊದಲ ಭಾರತೀಯ ಕ್ರಾಂತಿಕಾರೀಯಾಗಿ ವಂದೇಮಾತರಂ ಎಂದು ಹೇಳಿ ಹುತಾತ್ಮನಾದ.

ನಂತರದಲ್ಲಿ ಅನೇಕರು ಸಾವರ್ಕರ್ ಸಂಪರ್ಕಕ್ಕೆ ಬಂದು ದೇಶಕ್ಕಾಗಿ ಸ್ವಾತಂತ್ರ್ಯ  ತಂದುಕೊಡಲು ಸನ್ನದ್ಧರಾದರು. ಸಾವರ್ಕರ್ ರ ಸಲಹೆಯ ಮೇರೆಗೆ ನೇತಾಜಿ ಸುಭಾಷ್ ಚಂದ್ರಬೋಸ್ ಸೈನ್ಯ ಕಟ್ಟಿ ಜಪಾನ್, ಜರ್ಮನಿ ಹಾಗೂ ಇತರ ದೇಶಗಳ ಸಹಾಯ ಪಡೆದು ಬ್ರಿಟಿಷರ ಮೇಲೆ ದಾಳಿ ಮಾಡಿದರು.ಅಸ್ಪೃಶ್ಯತೆಯನ್ನು ಹೋಗಲಾಡಿಸಿ ಕೆಳವರ್ಗದವರಿಗೂ ದೇವಸ್ತಾನಕ್ಕೆ ಪ್ರವೇಶ ಕಲ್ಪಿಸಿದರು. ಸಾವರ್ಕರ್ ಅಂದ್ರೇನೆ ಹಾಗೆ ಅದೊಂದು ಕಿಚ್ಚು, ಶಕ್ತಿ,ದೇಶಪ್ರೇಮ.

                 

 ಸಾವರ್ಕರ್ ಒಬ್ಬ ಚಿಂತಕ ಕೂಡ ಆಗಿದ್ದರು. ಬ್ರಿಟಿಷರ 1857 ರಲ್ಲಿ ನಡೆದ ಕ್ರಾಂತಿಯನ್ನು ಸಿಪಾಯಿ ದಂಗೆ  ಎಂದು ಕರೆದರೆ ಸಾವರ್ಕರ್ ಅದನ್ನು ಪ್ರಥಮ ಸ್ವಾತಂತ್ರ್ಯ ಸಂಗ್ರಾಮ ಎಂದು ಹೇಳಿದರು. ಅದನ್ನಾದರಿಸಿ

'The Indian War of Independence' ಎಂಬ ಪುಸ್ತಕವನ್ನೇ ಬರೆದರು.ಬ್ರಿಟಿಷ ಸರ್ಕಾರ ಭಯಗೊಂಡು ಪುಸ್ತಕದ ಮಾರಾಟವನ್ನು ನಿಷೇಧಿಸಿತು. ಬ್ರಿಟಿಷರಲ್ಲಿ ಅಷ್ಟು ಭೀತಿಯನ್ನು ಈ ಪುಸ್ತಕ ಮೂಡಿಸಿತ್ತು.

ಮುಂದೆ ಇದೇ ಪುಸ್ತಕ ಭಗತ್ ಸಿಂಗ್, ಆಝಾದ್, ರಾಜಗುರು,ಸುಖದೇವ್ ಮುಂತಾದ ಕ್ರಾಂತಿಕಾರಿಗಳಿಗೆ ಸ್ವಾತಂತ್ರ್ಯ ಕೈಪಿಡಿಯಾಗಿ ಮಾರ್ಪಟ್ಟಿತು.

1910 ರಲ್ಲಿ ಬ್ರಿಟಿಷ್ ಸರ್ಕಾರ ಅವರನ್ನು ಬಂಧಿಸಿತು. ಅಂಡಮಾನ್ ಜೈಲಿನಲ್ಲಿ ಕಾಲಪಾನಿ ಶಿಕ್ಷೆ ವಿಧಿಸಿತು. ಬರೋಬ್ಬರಿ 50 ವರ್ಷಗಳ ಕಾಲ ಜೈಲಿನಲ್ಲಿ ಕೊಳೆಯುವ ಹಾಗೆ ಮಾಡಿತು. ಆದರೆ ಸಾವರ್ಕರ್ ರ ರಾಷ್ಟ್ರಪ್ರೇಮ ಇನ್ನು ಇಮ್ಮಡಿಯಾಯಿತು. ಜೈಲಿನ ಗೋಡೆಗಳ ಮೇಲೆ ಕಲ್ಲಿನಲ್ಲಿ ಕ್ರಾಂತಿಗೀತೆ,ದೇಶಭಕ್ತಿ ಗೀತೆಗಳನ್ನು ರಚಿಸಿದರು. ಮತಾಂತರವನ್ನು ತಡೆದರು.ಕೆಲವರನ್ನು ಮಾತೃ ಧರ್ಮಕ್ಕೆ ಕರೆತಂದರು. ಜೈಲಿನಲ್ಲಿಯೇ 'Hindutva;Who is hindu ?' ಪುಸ್ತಕವನ್ನೇ ಬರೆದರು. ಹಿಂದೂ, ಜೈನ, ಬೌದ್ಧ, ಸಿಖ್ ಎಲ್ಲವು ಒಂದೇ ಎಂದು ಹೇಳಿ

ಅಖಂಡ ಭಾರತ ದ ಪರಿಕಲ್ಪನೆಯನ್ನಿಟ್ಟರು.

1921 ರಲ್ಲಿ ಜೈಲಿನಿಂದ ಬಿಡುಗಡೆಗೊಂಡು

'ಹಿಂದೂ ಮಹಾಸಭಾ' ದ ನೇತೃತ್ವ ವಹಿಸಿಕೊಂಡು ಏಳು ವರ್ಷಗಳ ಕಾಲ ಅದರ ಅಧ್ಯಕ್ಷರಾಗಿ ಧರ್ಮ ಕಟ್ಟುವುದರಲ್ಲಿ ನಿರತರಾದರು. ಗಣೇಶ ಚತುರ್ಥಿ, ಹೋಳಿ ಹಬ್ಬ ಆಚರಿಸುವುದರ ಮೂಲಕ ಸ್ವಧರ್ಮಿರನ್ನು ಒಗ್ಗೂಡಿಸುವ  ಕೆಲಸ ಮಾಡಿದರು.

ಭಾರತ ಸ್ವಾತಂತ್ರ ಪಡೆಯುವುದರಲ್ಲಿ ಕ್ರಾಂತಿಕಾರಿಗಳ ಪಾತ್ರ ಅತ್ಯಂತ ಮಹತ್ವದ್ದು. ಮುಸ್ಲಿಮರು ದೇಶದ ವಿಭಜನೆಯ ಮಾತೆತ್ತಿದಾಗ ಸಾವರ್ಕರ್ ರು ವಿರೋಧಿಸಿದರು.

"ನೀವು ಬಂದರೆ ನಿಮ್ಮ ಜೊತೆ

ಬರದಿದ್ದರೆ ನಿಮ್ಮನ್ನು ಬಿಟ್ಟು

ಅಡ್ಡ ಬಂದರೆ ನಿಮ್ಮನ್ನೇ ಮೆಟ್ಟಿ

ಸ್ವಾತಂತ್ರಗಳಿಸುತ್ತವೆ" ಎಂದು ಹೇಳಿ ಎಚ್ಚರಿಸಿದರು.

             

ಸಾವರ್ಕರ್ ತಾವು ನಂಬಿದ್ದ ಸಿದ್ದಾಂತಕ್ಕೆ ಕಟಿಬದ್ಧರಾಗಿದ್ದರು.ಎಂದಿಗೂ ಬ್ರಿಟಿಷರೊಂದಿಗೆ ಕಾಂಪ್ರಮೈಸ್ ಆಗಿರಲಿಲ್ಲ.ತಮಗನ್ನಿಸಿದ ರೀತಿಯಲ್ಲೇ ಹೋರಾಟ ಮುಂದುವರೆಸಿದರು.ಸ್ವಾತಂತ್ರ ಪಡೆಯುವಲ್ಲಿ ಯಶಸ್ವಿಯಾದರು. ನಂತರ ಭಾರತ ಸ್ವಾತಂತ್ರ ಪಡೆದ ಸಂತೋಷಕ್ಕಿಂತ ದೇಶ ವಿಭಜನೆಯಾದ ದುಃಖದಲ್ಲಿ ಮುಳುಗಿದರು.ಆರೋಗ್ಯವು ಕ್ಷೀಣಿಸುತ್ತಾ ಹೋಗಿತು. ಆಹಾರ ಸೇವನೆಯನ್ನು ನಿಲ್ಲಿಸಿ ಬಿಟ್ಟರು.

1966 ಫೆಬ್ರವರಿ 26 ರಂದು ದೇಹ ತ್ಯಜಿಸಿದರು.

ಭಾರತ ಇರುವವರೆಗೂ ಸಾವರ್ಕರ್ ಅವರ ತ್ಯಾಗ, ಬಲಿದಾನಗಳು ಅಮರವಾಗಿ ಉಳಿಯಲಿವೆ.

ಸಾವರ್ಕರ್ ಅವರನ್ನು ಟೀಕಿಸುವ ಬದಲು ಅವರಲ್ಲಿದ್ದ ರಾಷ್ಟ್ರಪ್ರೇಮವನ್ನು ಅಳವಡಿಸಿಕೊಂಡು ಭಾರತವನ್ನು 'ವಿಶ್ವಗುರು'ವನ್ನಾಗಿ ಮಾಡೋಣ.

ಜೈ ಹಿಂದ್ 🇮🇳

ಇಂತಿ ನಿಮ್ಮವ ✍️

🔹ಅಭಿಷೇಕ.ಜೆ.ಎಂ 🔹

Twitter :- @abhish_jm

Instagram :- @abhish_jm

'D-Mart' ಬಗ್ಗೆ ನಿಮಗೆಷ್ಟು ಗೊತ್ತು..?!!

  "D-Mart" ಎಲ್ಲರಿಗೂ ಚಿರಪರಿಚಿತ.ಇದು ಭಾರತದ ಅತಿದೊಡ್ಡ ಸೂಪರ್ ಮಾರ್ಕೆಟ್ ಚೈನ್.ಅತ್ಯಂತ ಕಡಿಮೆ ಬೆಲೆಗೆ ಅಗತ್ಯ ವಸ್ತುಗಳನ್ನು ಕೊಂಡುಕೊಳ್ಳಬಹುದಾದ ಮಾರ್ಕೆಟ್.ಇಲ್ಲಿ ದಿನನಿತ್ಯ ಬಳಸುವ ವಸ್ತುಗಳಾದ ಆಹಾರ ಸಾಮಗ್ರಿಗಳು,ಬಟ್ಟೆಗಳು,ಅಡುಗೆಮನೆ ಸಾಮಗ್ರಿಗಳು, ತರಕಾರಿ, ಹಣ್ಣು,ಬ್ಯೂಟಿ ಸಾಮಗ್ರಿಗಳು ಇನ್ನು ಅನೇಕ  ಪ್ರತಿನಿತ್ಯಬೇಕಾಗುವ ವಸ್ತುಗಳು ಇಲ್ಲಿ ಕೈಗೆಟಕುವ ದರದಲ್ಲಿ ಸಿಗುತ್ತವೆ.

  ರಾಧಾಕೃಷ್ಣನ್ ದಮಾನಿ ಇದರ ಸಂಸ್ಥಾಪಕರು.ಇವರು ಮೂಲತಃ ರಾಜಸ್ತಾನದ ಬೀಕನೆರ್ ಎಂಬ ಊರಿಗೆ ಸೇರಿದವರು. Avenue Supermarts Ltd.(ASL) ಮೂಲಕ D-Mart ಅನ್ನು 2002 ರಲ್ಲಿ ಪ್ರಾರಂಭಿಸಿದರು.ಮುಂಬೈನ ಪೋವೈನಲ್ಲಿ ಇದರ ಮೊದಲ ಬ್ರಾಂಚ್ ಆರಂಭವಾಯಿತು.ಅಲ್ಲದೇ ಪೋವೈ, ಮುಂಬೈಯಲ್ಲೆ ಇದರ ಪ್ರಧಾನ ಕಚೇರಿ ಇದೆ.

ಕರ್ನಾಟಕ,ಮಹಾರಾಷ್ಟ್ರ,ಆಂಧ್ರಪ್ರದೇಶ, ತೆಲಂಗಾಣ, ತಮಿಳುನಾಡು, ಮದ್ಯಪ್ರದೇಶ,ರಾಜಸ್ತಾನ್, ಉತ್ತರಪ್ರದೇಶ,ಪಂಜಾಬ್,ಚಂಡಿಗಡ್,ಗುಜರಾತ್ ಹೀಗೆ ದೇಶಾದ್ಯಂತ 11 ರಾಜ್ಯಗಳ 72 ನಗರಗಳಲ್ಲಿ ಒಟ್ಟು 206 ಬ್ರಾಂಚ್ ಗಳನ್ನು ಹೊಂದಿ ತನ್ನ ಕಾರ್ಯನಿರ್ವಹಿಸುತ್ತಾ ಜನರ ದಿನನಿತ್ಯದ ಬದುಕಿಗೆ ಆಸರೆಯಾಗಿದೆ.

  D-Mart, D-Mart Minimax, D-Mart Premia, D-Homes, Dutch Harbor ಹೀಗೆ ಹಲವು ಕಂಪನಿಗಳನ್ನು ಪ್ರಾರಂಭಿಸುವ ಮೂಲಕ Avenue Supermarts Ltd.(ASL)ನ ರಾಧಾಕೃಷ್ಣನ್ ದಮಾನಿ ಅವರು ತಮ್ಮ ವ್ಯಾಪಾರ-ವಹಿವಾಟುಗಳನ್ನ ವೃದ್ಧಿಸಿಕೊಂಡಿದ್ದಾರಲ್ಲದೆ,ವಿಸ್ತರಿಸಿ ಕೊಂಡಿದ್ದಾರೆ.ಅದಲ್ಲದೆ ರಾಧಾಕೃಷ್ಣನ್ ದಮಾನಿಯವರು ಫೋರ್ಬ್ಸ್ ಟಾಪ್ 10 Billionaire ಗಳಲ್ಲಿ ಒಬ್ಬರಾಗಿ ಹೊರಹೊಮ್ಮಿದ್ದಾರೆ.

  ಇತ್ತೀಚಿನ ದಿನಗಳಲ್ಲಿ COVID-19 ಮಹಾಮಾರಿ ಜಗತ್ತಿನಾದ್ಯಂತ ತನ್ನ ಪ್ರಭಾವ ಬೀರುತ್ತಾ ಅನೇಕ ಜನರ ಜೀವನವನ್ನ ಕೊನೆಯಾಗಿಸಿದೆ. ಭಾರತದಲ್ಲೂ ದಿನೇ ದಿನೇ ಹೆಚ್ಚುತ್ತಿದೆ. ಹೀಗಿರುವಾಗ ಭಾರತ ಸರ್ಕಾರ ದೇಶವನ್ನು ಲಾಕ್ ಡೌನ್ ಮಾಡುವ ಮೂಲಕ ಎಲ್ಲ ವ್ಯಾಪಾರ ವಹಿವಾಟನ್ನು ಸ್ಥಗಿತಗೊಳಿಸಿದೆ.ಆದರೆ D-Mart ಎಂದಿನಂತೆ ತನ್ನ ಕಾರ್ಯ ನಿರ್ವಹಿಸುತ್ತಿದೆ.ಜನರಿಗೆ ಬೇಕಾಗುವ ದಿನನಿತ್ಯದ ಸಾಮಗ್ರಿಗಳನ್ನು ಆನ್ಲೈನ್ ಮೂಲಕ ಗ್ರಾಹಕರ ಮನೆಗಳಿಗೆ ತಲುಪಿಸುವ ಕೆಲಸ ಮಾಡುತ್ತಿದೆ.ಹೀಗೆ ತನ್ನ ಗಲ್ಲಾಪೆಟ್ಟಿಗೆಯನ್ನು ಭರ್ತಿ ಮಾಡಿಕೊಳ್ಳುತ್ತಿದೆ.

 ಅದಲ್ಲದೇ PM Care's Fund ಗೆ 100 ಕೋಟಿ ಹಾಗೂ ಮಹಾರಾಷ್ಟ್ರ,ಗುಜರಾತ್ ಸರ್ಕಾರಕ್ಕೆ ತಲಾ 10 ಕೋಟಿ, ಕರ್ನಾಟಕ, ಆಂದ್ರಪ್ರದೇಶ, ತೆಲಂಗಾಣ, ಪಂಜಾಬ್, ರಾಜಸ್ತಾನ ರಾಜ್ಯ ಸರ್ಕಾರಗಳಿಗೆ ತಲಾ 5 ಕೋಟಿ ರೂ, ತಮಿಳುನಾಡು, ಛತ್ತೀಸ್ ಗಢ,ಮದ್ಯಪ್ರದೇಶ, ಉತ್ತರಪ್ರದೇಶ ರಾಜ್ಯ ಸರ್ಕಾರಗಳಿಗೆ ತಲಾ 2.5 ಕೋಟಿ ರೂಪಾಯಿ ಧನ-ಸಹಾಯವನ್ನು ಮಾಡುವ ಮೂಲಕ ಮಾನವೀಯತೆ ಮೆರೆದಿದ್ದಾರೆ. COVID-19 ವಿರುದ್ಧ ಹೋರಾಡಲು ದೇಶಕ್ಕೆ,ಪ್ರಧಾನಿಗಳಿಗೆ ಹಾಗೂ ಸರ್ಕಾರಕ್ಕೆ ಶಕ್ತಿ ತುಂಬಿದ್ದಾರೆ.

ಅವರಿಗೆ ಮತ್ತು ಅವರು ಸಾಕಿ ಬೆಳೆಸುತ್ತಿರುವ ಕಂಪೆನಿಗೆ ಒಳಿತಾಗಲಿ.

ಜೈ ಹಿಂದ್ 🇮🇳

ಇಂತಿ ನಿಮ್ಮವ ✍️

🔹ಅಭಿಷೇಕ್. ಜೆ. ಎಂ 🔹

Twitter:- @abhish_jm

Instagram:- @abhish_jm

  

"ಸಾಮಾಜಿಕ ಜಾಲತಾಣ"

  ಇತ್ತೀಚಿನ ದಿನಗಳಲ್ಲಿ ಸಾಮಾಜಿಕ ಜಾಲತಾಣವು ತನ್ನದೇಯಾದ ಪ್ರಾಮುಖ್ಯತೆ ಪಡೆದುಕೊಂಡಿದೆ. ಚಿಕ್ಕವರಿಂದ ಹಿಡಿದು ವಯಸ್ಸಾದವರು ಕೂಡ ಸಾಮಾಜಿಕ ಜಾಲತಾಣಗಳಲ್ಲಿ ಸಕ್ರಿಯರಾಗಿದ್ದಾರೆ. 

ಫೇಸ್ಬುಕ್, ವಾಟ್ಸಪ್, ಇನ್ಸ್ಟಾಗ್ರಾಮ್, ಸ್ನಾಪ್ ಚಾಟ್, ಟ್ವಿಟ್ಟರ್, ಟೆಲಿಗ್ರಾಂ,ಯೂಟ್ಯೂಬ್,ಹೀಗೆ ಹತ್ತು ಹಲವು ಸಾಮಾಜಿಕ ಜಾಲತಾಣಗಳು ದಿನೇ ದಿನೇ ತನ್ನ ಬಳಕೆದಾರರನ್ನು ಹೆಚ್ಚಿಸಿಕೊಳ್ಳುತ್ತಲೆ ಇದೆ.

  ಜಗತ್ತಿನಲ್ಲಿ ೨ನೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶ ಭಾರತ.ಆದ್ದರಿಂದ ಇಲ್ಲಿ ಮೊಬೈಲ್ ಬಳಕೆದಾರರ ಸಂಖ್ಯೆಯು ಹೆಚ್ಚಿದೆ.ಪ್ರತಿ ಮನೆಗೆ ಒಬ್ಬರಂತೆ ಹಿಡಿದರು ದೇಶದಲ್ಲಿರುವ ಮನೆಗಳ ಸಂಖ್ಯೆಯ ಲೆಕ್ಕ ಸಿಕ್ಕರೆ ನಿಮಗೆ ದೇಶದಲ್ಲಿ ಸಾಮಾಜಿಕ ಜಾಲತಾಣಗಳನ್ನು ಬಳಸುವವರ ಅಂದಾಜು ಸಿಗಬಹುದು. 

  ಸಾಮಾನ್ಯ ನಾಗರಿಕರು ಸಹ ಇದರತ್ತವಾಲಿದ್ದಾರೆ. ದಿನಪತ್ರಿಕೆ ಓದುವುದು, ವಾರ್ತೆ ಕೇಳುವುದು, ಅಲ್ಲದೆ ಹೆಂಗಸರು ಅವರಿಗಿಷ್ಟವಾದ ಧಾರಾವಾಹಿ, ಸಿನೆಮಾ ನೋಡುವುದು ಹೀಗೆ ಹತ್ತು ಹಲವು ರೀತಿಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ.ಇನ್ನು ರಾಜಕೀಯ ಪಕ್ಷಗಳ ನಾಯಕರು ಸಹ ಸಾಮಾಜಿಕ ಜಾಲತಾಣಗಳ ಮೊರೆ ಹೋಗಿದ್ದಾರೆ. ಅವರ ರಾಜಕೀಯ ಪ್ರಚಾರ ಇದರ ಮೂಲಕವು ನಡೆಯುತ್ತಿದೆ.ಎಷ್ಟೋ ಸಮಸ್ಯೆಗಳು ಸಾಮಾಜಿಕ ಜಾಲತಾಣಗಳ ಮೂಲಕ ಬಗೆಹರಿದಿವೆ. ಅಲ್ಲದೇ ರಾಜಕೀಯ ನಾಯಕರ ಪರ-ವಿರೋಧದ ಅಲೆ,ಲೈಕ್,ಕಮೆಂಟ್ ಗಳ ಸುರಿಮಳೆ.ಹೀಗೆ ಸಾಮಾಜಿಕ ಜಾಲತಾಣ ತನ್ನ ಪ್ರಭಾವವನ್ನು ಎಲ್ಲೆಡೇ ಬೀರಿದೆ.

  ಇನ್ನು ಇಂದಿನ ಯುವಪೀಳಿಗೆ ಬಗ್ಗೆ ಹೇಳಬೇಕೆಂದರೆ  ಭಾರತ ದೇಶ ಪ್ರಪಂಚದಲ್ಲಿ ಅತಿ ಹೆಚ್ಚು ಯುವಕರನ್ನು ಹೊಂದಿರುವ ದೇಶವಾಗಿದೆ.ಅವರು ಸಹ ಸಾಮಾಜಿಕ ಜಾಲತಾಣಗಳೇ ಜೀವನ ಎನ್ನುವ ಹಾಗೆ ಬದುಕುತ್ತಿದ್ದಾರೆ. ಎಷ್ಟೋ ಯುವಕರು ಇದರ ಮೂಲಕ ಜೀವನ ರೂಪಿಸಿಕೊಂಡಿದ್ದಾರೆ ಅಲ್ಲದೇ ಜೀವನವನ್ನು ಹಾಳು ಮಾಡಿಕೊಂಡಿದ್ದು ಇದೆ. ಸಾಮಾಜಿಕ ಜಾಲತಾಣವನ್ನು ಬಳಸುವ ಬಹುಪಾಲು ಯುವಕರು ಕೋಪ ಮತ್ತು ಭಯದಿಂದ ನರಳುತ್ತಿದ್ದಾರೆ ಎಂದು ಸಂಶೋಧನಾ ವರದಿಯೊಂದು ಹೊರಬಿದ್ದಿದೆ. ಇತ್ತೀಚಿನ ದಿನಗಳಲ್ಲಿ ಬರಿ ಸುಳ್ಳು ಸುದ್ದಿಗಳು, ಸುಳ್ಳು ಆರೋಪಗಳೂ ಸಹ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿವೆ.ಆದ್ದರಿಂದ ಯುವಕರು ಸತ್ಯದ ಬಗ್ಗೆ ಒತ್ತುಕೊಟ್ಟು ಒಳ್ಳೆಯ ರೀತಿಯಲ್ಲಿ ಸಾಮಾಜಿಕ ಜಾಲತಾಣವನ್ನು ಬಳಸಬೇಕಾಗಿದೆ.

  ಸಾಮಾಜಿಕ ಜಾಲತಾಣವಂತು ಮಾಹಿತಿ, ಅಭಿಪ್ರಾಯಗಳನ್ನು ಮುಕ್ತವಾಗಿ ಹಂಚಿಕೊಳ್ಳಲು ಬಹು ದೊಡ್ಡ ವೇದಿಕೆಯಾಗಿ ಪರಿವರ್ತನೆಯಾಗಿದೆ. ಎರೆ-ಮರೆಯಲ್ಲಿದ್ದ ಸಾವಿರಾರು ಪ್ರತಿಭೆಗಳು ಇದರಿಂದ ಅನಾವರಣಗೊಂಡಿವೆ. ವ್ಯಾಪಾರ-ವ್ಯವಹಾರ ವೃದ್ಧಿಗೆ, ಮಾರಲು, ಕೊಂಡುಕೊಳ್ಳಲು, ಪ್ರಚಾರ ಮಾಡಲು ಉತ್ತಮ ವೇದಿಕೆಯಾಗಿದೆ. ಎಷ್ಟೋ ಯುವಕರು ಇದರ ಮೂಲಕ ಜೀವನ ರೂಪಿಸಿಕೊಂಡಿದ್ದಾರೆ.

  ಇತ್ತೀಚೆಗೆ  COVID-19 ಜಗತ್ತಿನಾದ್ಯಂತ ತನ್ನ ಹೆಜ್ಜೆ ಇಟ್ಟಾಗಿನಿಂದ, ದೇಶವೇ ಲಾಕ್ ಡೌನ್ ಆದ ಕಾರಣ ಸಾಮಾಜಿಕ ಜಾಲತಾಣ ಬಳಸುವವರ ಸಂಖ್ಯೆ ವೃದ್ಧಿಸಿದೆ.

ಸಂಗೀತ, ಚಲನಚಿತ್ರ, ವಿಜ್ಞಾನ-ತಂತ್ರಜ್ಞಾನ, ಸಾಹಸ ಹೀಗೆ ಮನೋರಂಜನಾ ಕಾರ್ಯಕ್ರಮಗಳು ಇಲ್ಲಿ ದೊರೆಯುತ್ತಿರುವುದರಿಂದ  ಜನರನ್ನು ಸೂಜಿಗಲ್ಲಿನಂತೆ ಸೆಳೆಯುತ್ತಿದೆ.

"ಇಂದಿನ ಯುವಕರೇ ಮುಂದಿನ ಪ್ರಜೆಗಳು" ಆದ ಕಾರಣ ಜಾಲತಾಣಗಳಲ್ಲಿ ಅತಿ ಹೆಚ್ಚು ಸಕ್ರಿಯರಾಗಿರುವ ಯುವಕರು ಸರಿಯಾದ ರೀತಿಯಲ್ಲಿ ಇದನ್ನು ಬಳಸಬೇಕಾಗಿದೆ. ಜಾಲತಾಣಗಳ ಮೂಲಕ ದೇಶ ವಿರೋಧಿ ಹೇಳಿಕೆ ಕೊಡುವುದು,ದೇಶಕ್ಕೆ ಮಾರಕವಾಗುವಂತಹ ಕೃತ್ಯ ಎಸಗುವುದನ್ನು ನಿಲ್ಲಿಸಿ ಒಳ್ಳೆಯ ರೀತಿಯಲ್ಲಿ ದೇಶಕ್ಕೆ ಹಾಗೂ ತಮಗೆ ಒಳಿತಾಗುವಂತಹ ಕೆಲಸ ಇದರ ಮೂಲಕ ಮಾಡಬೇಕಾಗಿದೆ.ತಮ್ಮಲಿರುವ ಪ್ರತಿಭೆ ಅನಾವರಣ ಮಾಡಿಕೊಳ್ಳಲು ಒಳ್ಳೆಯ ವೇದಿಕೆಯಾಗಿ ರೂಪಗೊಂಡಿದೆ.

   ಆದ್ದರಿಂದ ಸಾಮಾಜಿಕ ಜಾಲತಾಣಗಳನ್ನು ಒಳ್ಳೆಯ ರೀತಿ ಬಳಸಿಕೊಂಡು ದೇಶ ಕಟ್ಟುವ ಕೆಲಸ ಮಾಡಬೇಕಾಗಿದೆ.ಆಗ ಮಾತ್ರ "ದೇಶ ನಮಗೇನು ಕೊಟ್ಟಿದೆ ಅನ್ನುವುದಕ್ಕಿಂತ ನಾವೇನು ದೇಶಕ್ಕೆ ಕೊಟ್ಟಿದ್ದೇವೆ" ಎಂಬ ಮಾತಿಗೆ ಉತ್ತರ ದೊರಕುತ್ತದೆ. ಇದರ ಮೂಲಕ ಸಾಮಾಜಿಕ ಜಾಲತಾಣಗಳನ್ನು ಒಳ್ಳೆಯ ರೀತಿ ಬಳಸಿಕೊಂಡು ದೇಶವನ್ನು ಕಟ್ಟುವ ಕೆಲಸ ಮಾಡೋಣ..

ಜೈ ಹಿಂದ್ 🇮🇳

ಇಂತಿ ನಿಮ್ಮವ ✍️

🔹ಅಭಿಷೇಕ. ಜೆ. ಎಂ🔹

Twitter- @abhish_jm

Instagram- @abhish_jm